Egyptian Revolution Jan 25th 2011 - Take what's Yours! from JoeChaban on Vimeo.
Saturday, February 19, 2011
Friday, February 18, 2011
في البداية
في البداية, انا مش عارف شكل البلوج ده هيكون ازاي, فاللي هيقراه غالبا هيلاحظ تطور مع الوقت في طريقتي البدائية. وده لأني عمري ما كنت كويس في التعبير عن نفسي على الانترنت لا عن طريق الجمل اللي بتوصف الأحاسيس ولا عن طريق الحكم والعبر اللي ناس بتحطها على الميسنجر وغيره. بالاضافة اني متأخر أوي في موضوع الشبكات الاجتماعية, فانا حتى معنديش فيسبوك.
رغم اني بكتب عربي بطئ جدا على الكمبيوتر, الا اني صممت اني اكتب على الأقل أول بوست بالعربي. أولا لأن ديه طبيعتي: اني اكون مدي لهويتي احترامها ومكانها ولو بصورة رمزية. ثانيا لأن الثورتين في تونس و مصر صحوا جوايا شوية حاجات وفكرتني ان المنطقة المهببة اللي احنا فيها ديه, فيها أمل لما الناس يتعوز تعمل حاجة مع بعض, فعلى الأقل ندي انتماءنا للمنطقة دي احترامه. ثالثا ودي أهم نقطة, ان ثورة 25 يناير حسستني اني لازم اهتمامنا عامة واهتمامي انا بالذات يكون بمصر. زمان كنت بقول ان الطريق الوحيد عشان اصلح في مصر هو اني اخد خبرة برة (برة دي يعني افريقيا وامريكا اللاتينية, يعني مناطق انيل مننا) واجي انط على السلطة في مصر (مش عارف ازاي, بس غالبا كخبير كبير) وبالسلطة اطبق مشروعي الاصلاحي الكبير (بعدين بعدين) . لكن في أمل ظهر وهو أن ممكن الواحد يأخذ الطريق من أوله في مصر من غير متدفن امكانياته ولا رغبته في عمل حاجة للبلد دي. وبالتالي فطريقة الباراشوت ليست الحل الأمثل زي ما كنت بفكر زمان. طبعا حكاية الأمل في أن الواحد متندفينش امكانياته حياخذ وقت لأن دي مشكلة شعب بردو لكن أهو شوية معافرة مع الأمل أحسن من مفيش. وبالتالي جزء من اهتمامي بمصر هوا أني اعبر عن آرائي فيها واقول افكاري لتحسينها وعسى حاجة تكون مفيدة
عامة عشان ماخرجش عن الموضوع اللي هوا تقديم البلوج ده لعزيزاتي وأعزائي القراء (اللي هما غالبا انا بس وربما شخص منحوس جوجل رماه على هنا ) , اقولهم ليه دلوقتي انا بكتب. ببساطة لأني قاعد حاليا في أحراش جوبا عاصمة جنوب السودان على ضفاف النيل عمال اسمع مزيكا افريقي من الكمب المجاور. وقد زهقت من القراية عن جنرالات جنوب السودان وتحضير أسئلة المقابلات معاهم عشان بحث الماجستير بتاعي. وحست اني عاوز ادلؤ شوية كلام لناس معرفهومش. احب اقول اني لا اضمن المتابعة في الكتابة بشكل منتظم لاني مبعرفش اتابع بشكل منتظم حاجة على فترة طويلة (زي المسلسلت كده). بس عامة هاحاول. حاجة اخيرة, انا عادة مبحبش الكتابة بالعامية, بس لقيت ان معظم الناس بتكتب بيها فقلت يمكن هيا دي سر التعبير الجامد اوي عن مكنونات النفس على الانترنت. غير اني كمان لا اضمن اني لو كتبت بالفصيح ان الناس هتفهم في زمن بقينا نحط فيه الهمزة على ال. ما علينا. لقد بدأت حقبتي في البلوجينج و اتمنى انها تكمل على خير انشاءالله. سلامات
Subscribe to:
Posts (Atom)