جدليات تنموية

امبارح كنت في اجتماع في المؤسسة المصرية لمحاور التنمية، كان ضيفه د.عبدالمحسن برادة، خبير استراتيجيات تخطيط العمران والاسكان
كان الهدف الرئيسي استعراض بعض مشاريع التنمية ومناقشة مشروع ممر التنمية، بتاع د.فاروق الباز، وأفضل استراتيجيات التطبيق نظرا لأن الد. عبدالمحسن عنده خبرة طويلة في مشاريع التخطيط العمراني وتطبيقها

 وممكن يوضح لنا بعض النقط اللي نأخذ بانا منها عند التطبيق

أولا الرجل أشار لمشكلة عويصة وهي أن مصر تفتقر لآليات تحويل الخطط والدراسات النظرية إلى مشاريع على أرض الواقع، وأن عمليات التنفيذ غالبا ما بتصطدم بالقوانين والاجراءات الحكومية. مثلا، في  مشروع يسعى لمنح حق الانتتفاع من الأراضي لفئة معينة بصورة معينة لانشاء مجموعة مُحددة من المشاريع، لكن وقت التنفيذ تظهر بقى كل المصطلحات واللعابيك والأوبح القانوني فيتعثر 

التطبيق ثم يشيخ المشروع وتموت الفكرة،وهكذا

بيانات محزنة \ مرعبة:

الرجل تفضل وأوضح مرارا مجموعة من المقومات الموجودة في مناطق معينة علشان انتاج طاقة الرياح والطاقة الشمسية (مش كلام بوابين لكن ببيانات وخرائط ومشاريع...الخ) لكن لم يخل العرض من بيانات مرعبة وقصص تحزن

مثلا، البترول اللي في منطقة رأس غارب، على أقصى تقدير هينفذ في خلال 15 عاما

مش مهم، لكن اللي فرق معايا أوي كان الحديث عن مشروع تنمية منطقة غرب الدلتا

صورة لاحدى المشاريع في المنطقة

نبذة كدة عنها: منطقة غرب الدلتا هي منطقة طريق مصر اسكندرية الصحراوي اللي بنعدي فيها كلنا تقريبا في الصيف. المنتجعات اللي على الشمال (الريف الأوروبي وغيرها) ما هي إلا واجهة تغطي امتداد 25 كم من الزراعات في الصوب و الصناعات القائمة على الزراعة. المنطقي دي بتصدر ما يقرب من 37% من اجمالي صادرات مصر الزراعية. وصل قيمة التصدير من المنطقة دي لوحدها في عام 2005 إلى 6.2 مليار دولار. مشاكل المنطقة هي الاعتماد على المياه الجوفية وعدم وجود طريق سهل وسريع للمطار.

فايزة أبو النجا، قدرت تجيب تمويل لبناء مشروع ري متطور ومتكامل معتمد على مياه النيل وده للاستغناء عن المياه الجوفية، وبعد ما الناس جت ودفعت ما يقرب من 165 مليون دولار ومستثمرين محليين دفعوا حوالي 35 مليون دولار وتم ادراج المشروع في ميزانية 2010 للتطبيق في 2011، طبعا....... للأسف توقف مع الثورة وللآسف الأكبر أن لغاية دلوقتي متكملش ومش باين انه هيتكمل قريبا.

نفس الكلام بالنسبة لمشروع مد طريق سريع من المنطقة دي لمطار برج العرب لتسهيل التصدير وللآسف....

التقديرات حول عائدات التصدير من المنطقة دي انها تُقدر السنة دي بأقل من 2 مليار دولار ..... مفيش سمايلي فيس هنا بس لو فيه كنت حط وش بيعيط

مشروع تاني يكئب كده بردو...ولا بلاش المهم يعني ان كوبري لنقل 200 ألف عامل من الدلتا لمنطقة صناعية متوقف و مش عارف ايه متوقف وايه متوقف بردو وخير يعني انشاءالله

جدليات تنموية:

طبعا كان في أسئلة...الحمدلله لها اجابة...زي عن النموذج التنموي الأمثل وكان الكلام عن حاجة زي دبي...لكن الحوار وصل أن لا يمكن القياس على دبي لأنها ببساطة دويلة يقوم عليها رجل أعمال و(CEO) شاطر اللي هو الشيخ محمد آل مكتوم.....في حين أن مصر دولة عملاقة ومؤسسات عميقة ومشاكل لا حصر لها وبالتالي النموذج ده لا يقارن أصلا... لكن نماذج أخرى تنفع زي التجربة الماليزية و المهندية، عفوا قصدي التركية

وطبعا كان في أسئلة تانية ملهاش اجابة (وما أكثرها)...زي لماذا لا تمتلك مصر (masterplan) طويلة المدى للتنمية ؟ 

وهل أهمية مشروع قناة السويس الجديد عو بناء ميناء حديث ولا عمل نقطة تمركز صناعية على البحر؟ وايه جدوى الدراسات اللي بتتكلم عن أهميته هتتنتهي في 2015 لوجود مشاريع بديلة تقوم بها دول أخرى و ليه مستعجلين وليه مبنعملش...الخ الخ.

الجدل بقى اللي شعشع بشكل رئيسي امبارح هو: كيف يتم الشروع في تنفيذ خطط التنمية الشاملة .....هل تكون بخطة شاملة تشتغل تبدأ كل الأقطار والمناطق في نفس الوقت؟؟ أم تبدأ ب(pilot project) \ مشروع رائد يُطبق في منطقة ثم تُعمم التجربة؟؟؟؟

وهي دي نهاية حلقتنا النهاردة من جدليات تنموية...نشوفكم اللقاء القادم